237. fundur sveitarstjórnar Bláskógabyggðar

Umræða varð um málið. Sveitarstjórn samþykkir að fara í vettvangsferð vegna málsins og frestar afgreiðslu þess til næsta fundar.

-liður 3, Heiðarbær lóð L170266; Niðurrif og endurbygging sumarhúss; Fyrirspurn – 1907027
Lögð er fyrir umsókn Harðar Ólafssonar og Jórunnar Frímannsdóttur, dags. 2. júlí 2019, um rif eldra húss og byggingu nýs sumarhúss með sömu staðsetningu í huga. Stærð nýs húss yrði allt að 115 m2 og jafnframt viðmið byggingar fari ekki yfir 0,03 nýtingarhlutfall.
Sveitarstjórn gerir ekki athugasemd við fyrirhugð byggingaráform og felur byggingarfulltrúa að veita byggingarleyfi með fyrirvara um niðurstöður grenndarkynningar.

-liður 4, Skógarnes – Orlofssvæði Rafiðnaðarsambands Íslands; Austurey lóð L167697; Stækkun byggingarreits; Deiliskipulagsbreyting – 1903054
Lögð fram að nýju umsókn Rafiðnaðarsambands Íslands, dags. 26. mars 2019, Austurey lóð L167697, um deiliskipulagsbreytingu vegna stækkunar á byggingarreit vegna fyrirhugaðrar skemmubyggingar. Tillagan var kynnt með grenndarkynningu frá 14.maí 2019 með athugasemdafresti til 18.júní 2019. Athugasemdir bárust.
Umsækjandi hefur með innsendum skýringauppdrætti gert nánari grein fyrir afstöðu og hæðarlegu fyrirhugaðrar vélageymslubyggingar en þar kemur fram að byggingin mun verða staðsett í hvilft í framhaldi af þegar byggðri vélageymslu í sömu hvilft. Mænishæð mun aðeins ná um það bil 1,5m upp fyrir landhæð aðliggjandi lóðar og að auki innan við trjágróður sem í dag nær um það bil 6m upp fyrir sömu lóð. Skipulagsnefnd metur athugasemdir sem bárust óverulegar.
Sveitarstjórn Bláskógabyggðar samþykkir deiliskipulagsbreytinguna í samræmi við 3. mgr. 41. gr. skipulagslaga nr.123/2010. Skipulagsfulltrúa er falið að senda Skipulagsstofnun tillöguna til afgreiðslu og er einnig falið að svara þeim aðilum sem gerðu athugasemdir.

-liður 5, Skútabraut 4 L167559; Úthlíð 2 L167181; Staðfesting á afmörkun og breytt stærð lóðar – 1907023
Lögð fram umsókn Ólafs Björnssonar f.h. Geirs Goða ehf, dags. 21. júní 2019 um staðfestingu á afmörkun og breytingu á stærð lóðarinnar Skútabraut 4 L167559 í landi Úthlíðar. Hnitsetning lóðarinnar hefur ekki legið fyrir áður. Stærð lóðarinnar breytist úr 3.500 m2 í 5.742,9 m2 skv. meðfylgjandi hnitsettu lóðablaði. Fyrir liggur samþykki landeigenda Úthlíðar og lóðarhafa aðliggjandi lóðar L167558 á hnitsetningu lóðamarka. Þegar liggur fyrir áður samþykkt lóðablað fyrir Skútabraut 5.
Skipulagsnefnd gerir ekki athugasemd við afmörkun og breytingu á skráningu lóðar miðað við fyrirliggjandi gögn. Ekki er gerð athugasemd við landskipti skv. 13. gr. jarðalaga. Sveitarstjórn Bláskógabyggðar samþykkir fyrirliggjandi umsókn.

-liður 6, Snorrastaðir lóð L168107; Geymsla og baðhús á lóð; Fyrirspurn – 1906062
Lögð er fram fyrirspurn Runólfs Þ. Sigurðssonar, dags. 22. júní 2019, fyrir hönd Höskuldar Ólafssonar. Óskað er svara við hvort leyfi fengist til að staðsetja geymslu og baðhús 5m frá lóðarmörkum. Umsækjandi vill að fram komi að eldra hús á lóðinni sem nú hefur verið rifið var staðsett um 1,5m frá sömu lóðamörkum.
Sveitastjórn Bláskógabyggðar hafnar beiðninni í ljósi þess að byggingarmagn fari yfir nýtingarhlutfall 0,03 og byggingin fari of nærri lóðarmörkum.

Almennt um stofnun miðhálendisþjóðgarðs:
Af hálfu Bláskógabyggðar eru ítrekaðar fyrri athugasemdir þess efnis að ekki hefur farið fram grunnvinna sem sveitarfélagið telur algerlega nauðsynlegan undanfara að vinnu þverpólitísku nefndarinnar sem vinnur að stofnun þjóðgarðs á miðhálendi Íslands, þ.e. varðandi það að meta kosti og galla þess að ráðast í það verkefni að stofna þjóðgarð á miðhálendi Íslands.
Sveitarstjórn tekur undir öll eftirfarandi áhersluatriði sem Húnavatnshreppur tiltekur í umsögn sinni:
A. Ekki hefur verið tekið til umfjöllunar og tekið upp samráð á vegum lýðræðislega kjörinna fulltrúa um kosti og galla þjóðgarðsstofnunar m.a. með tilliti til annarra friðunar- og verndarheimilda, sbr. t.d. nýleg náttúruverndarlög og heimildir til hverfisverndar samkvæmt skipulagsáætlunum.
B. Umfjöllun og skýringar um þýðingu alþjóðlegra viðmiða um þjóðgarða hefur ekki komið fram. Lýsingar á heimildum til annarra notkunar svæða en fellur undir kjarnasvæðis þjóðgarðs og kröfur um lágmarksumfang slíks svæðis er því óáreiðanleg til að byggja á ákvarðanatöku sveitarfélaga.
C. Ljóst er að stofnun þjóðgarðs felur í sér verulega takmörkun á skipulagsvaldi sveitarfélaga og þar með forræði sveitarstjórna á að marka stefnu um þróun byggðar og landnotkunar í sveitarfélagi.
D. Stofnun þjóðgarðs takmarkar ráðstöfunarheimildir sveitarfélaga yfir þjóðlendum og heimildir til að afla tekna vegna starfsemi í þjóðlendum, sem sveitarfélög geta nýtt í þágu þjóðlenda innan sveitarfélagamarka.
E. Ófyrirséðar breytingar geta orðið á lagalegri umgjörð um þjóðgarð og stjórnunar- og verndaráætlun í framtíðinni, sbr. t.d. breytingar sem raskað hafa forsendum sem til staðar voru við stofnun Vatnajökulsþjóðgarðs.
F. Nýting afréttareignar innan þjóðgarðs, sem og önnur starfssemi, verður háð stjórnunar- og verndaráætlun þjóðgarðs.
G. Aðkoma sveitarfélags að stjórn þjóðgarðs verður óveruleg.

Mörk miðhálendisþjóðgarðs:
Sveitarstjórn leggst gegn því að landsvæði innan marka sveitarfélagsins verði felld undir miðhálendisþjóðgarð. Fer sveitarstjórn fram á að í því tilviki að ekki verði tekið tillit til andmæla hennar verði teknar upp samningaviðræður við sveitarfélagið í þeim tilgangi að skilgreina mörk miðhálendisþjóðgarðs innan marka þess.
Sveitarstjórn telur rétt að ákvörðun um mörk þjóðgarðs byggi á faglegu mati sem byggt verði á eiginleikum svæða, en ekki verði horft eingöngu til eignarhalds og umráðaréttar yfir landi. Þá tekur sveitarstjórn undir ábendingu Húnavatnshrepps þar sem fram kemur að stofnun þjóðgarðs, sem aðallega væri byggð á eignarréttarlegum atriðum, yrði þannig forsenda takmörkunar á skipulagsvaldi sveitarfélaga. Vandséð er að hægt sé að rökstyðja það að eðlilegt sé að takmarka skipulagsvald sveitarfélaga út frá þáttum sem snúa að eignarhaldi eða umráðum lands. Verður því að koma til fagleg skoðun út frá sjónarmiðum náttúruverndar og inntaks aðalskipulags sveitarfélaga, þar sem ákvæði kunna að vera um hverfisvernd, landnotkun er skilgreind og settar takmarkanir útfrá forsendum sem varða m.a. vernd náttúru.

Skipting í verndarflokka:
Sveitarstjórn leggur áherslu á að vanda þarf til verka við skiptingu í verndarflokka þar sem horft verði til verndarmarkmiða svæða og að hafa verði samráð við alla hagsmunaaðila við þá vinnu, sem væntanlega verður unnin sem hluti af gerð stjórnunar- og verndunaráætlun fyrirhugaðs þjóðgarðs.

Aðkomuleiðir og þjónustumiðstöðvar:
Bláskógabyggð bendir á að sumar þjónustugáttir eru nokkuð langt frá hinum fyrirhugaða þjóðgarði. Telur sveitarstjórn eðlilegra að gáttirnar verði sem næst þjóðgarði. Verði af stofnun þjóðgarðs leggst sveitarstjórn ekki gegn staðsetningu þjónustugáttar á svæðinu við Gullfoss. Sveitarstjórn telur að þjónustugátt við Þingvelli væri of langt frá hinum fyrirhugaða þjóðgarði.