311. fundur sveitarstjórnar Bláskógabyggðar

-liður 3, Eyvindartunga: Frístundabyggð neðan Laugarvatnsvegar; Deiliskipulag – 1706048
Lögð er fram að nýju tillaga að deiliskipulagi svæðis úr landi Eyvindartungu sem liggur frá Laugarvatnsvegi að Laugarvatni, milli Litluár og Djúpár, eftir auglýsingu. Deiliskipulagið tekur til svæða sem eru skilgreind sem F23 og F24 innan aðalskipulags Bláskógabyggðar þar sem gert er ráð fyrir heimild fyrir allt að 60 frístundalóðum. Markmið deiliskipulagsins er m.a. að ákvarða lóðamörk, byggingarmagn og nýtingarhlutfall innan svæðisins auk þess sem gert er grein fyrir aðkomu og veitum. Umsagnir bárust á auglýsingatíma skipulagsins og eru þær lagðar fram við afgreiðslu málsins.
Fyrir liggur umsögn Minjastofnunar þar sem fram kemur að samkvæmt mati stofnunarinnar sé þörf á að fá fornleifafræðing til að skrá fornleifar á skipulagssvæðinu þar sem slík skráning hafi ekki farið fram. Í svarbréfi landeiganda vegna umsagnar Minjastofnunar kemur fram að engar vísbendingar séu um mannvistarleifar á viðkomandi svæði sem deiliskipulagstillagan tekur til og að í fyrri umsögnum Minjastofnunar vegna Sandárvirkjunar hafi ekki verið talin þörf á fornleifaskráningu á svæðinu. Sveitarstjórn telur ástæðu til að farið verði að umsögn Minjastofnunar í málinu og að fornleifafræðingur verði fenginn til að fara um svæðið og skrá fornleifar eða eftir atvikum að staðfesta að engar fornleifar séu innan skipulagssvæðisins. Sveitarstjórn Bláskógabyggðar samþykkir að gildistöku deiliskipulagsins verði frestað þar til niðurstaða fornleifaskráningar liggur fyrir. Sveitarstjórn telur að öðrum umsögnum vegna málsins sé svarað með fullnægjandi hætti innan uppdráttar og greinargerðar skipulagsins.

-liður 4, Skálabrekka L170163; Efnistaka; Vegagerð; Framkvæmdarleyfi – 2208037
Lögð er fram umsókn um framkvæmdaleyfi vegna efnistöku og vegagerðar í landi Skálabrekku L170163. Sótt er um leyfi til að taka hluta af efni í vegagerð í landi Skálabrekku Eystri í Bláskógabyggð vegna fyrirhugaðrar vegalagningar sem áætluð er nú í haust. Efnið verður sótt í gamla malargryfju sem er í landinu, rúmlega 500 m frá þjóðvegi nr. 36 og ca. 900 m frá vatnsbakka Þingvallavatns. Fyrirhugaður vegur er sýndur á yfirlitsmynd af svæðinu á nýlega samþykktu deiliskipulagi Skálabrekku Eystri og verður u.þ.b. 3,8 km. langur. Efnið er hluti af efni sem nýtt er til vegagerðar, meginhluta þarf að sækja annað.
Sveitarstjórn telur að ekki sé unnt að veita framkvæmdaleyfi fyrir fyrirhugaðri efnistöku þar sem engin náma er skilgreind innan jarðarinnar innan aðalskipulags Bláskógabyggðar. Sveitarstjórn bendir þó á að samkvæmt 2. mgr. 13. gr. skipulagslaga nr. 123/2010 er eiganda eða umráðamanni eignarlands heimil án leyfis minni háttar efnistaka til eigin nota nema um sé að ræða náttúruverndarsvæði eða jarðminjar eða vistkerfi sem njóta verndar skv. 61. gr. laga um náttúruvernd. Að mati sveitarstjórnar telst þó efnistaka vegna verulegrar vegagerðar ekki til minni háttar efnistöku til eigin nota. Sveitarstjórn samþykkir útgáfu framkvæmdaleyfis sem tekur til veglagninga á grundvelli samþykkts deiliskipulags fyrir Skálabrekku Eystri með fyrirvara um að efni vegna framkvæmdarinnar sé tekið úr námu sem hafi framkvæmdaleyfi og eftir atvikum gilt starfsleyfi. Skipulagsfulltrúa er falin útgáfa framkvæmdaleyfis.

-liður 5, Traustatún 4 L234170; Þakform; Fyrirspurn – 2208039
Stefanía Hákonardóttir vék af fundi við afgreiðslu málsins. Lögð er fram fyrirspurn til skipulagsnefndar frá Jakobi Emil Líndal fh. eigenda lóðar Traustatúns 4. Samkvæmt skipulagsskilmálum fyrir „Laugarvatn, deiliskipulag þéttbýlis “ samþykkt í júní 2021 er tekið fram í kafla 4.3 að „Þakform skal vera valmaþak“. Óskað er eftir leyfi til að hafa þakform frjálst en að öðru leyti verða skilmálar óbreyttir.
Skipulagsnefnd UTU mæltist til þess við sveitarstjórn Bláskógabyggðar að skilmálar nýlega samþykkts deiliskipulags fyrir Laugarvatn verði óbreyttir og mælist til þess að framlagðri fyrirspurn verði synjað. Tilgangur viðkomandi skilmála var að sjá til þess að ný hús myndu falla sem best að núverandi byggð og á milli þeirra væri innbyrðis samræmi m.t.t. hlutfalla og forms.
Sveitarstjórn Bláskógabyggðar tekur ekki undir framlagða bókun skipulagsnefndar vegna fyrirspurnar er varðar þakform innan deiliskipulagsins að Laugarvatni. Að mati sveitarstjórnar er valmaþak ekki ríkjandi formgerð þaka á svæðinu og telur því að ekki sé ástæða til að hefta þakform nýrra bygginga eingöngu við valmaþak á þeim forsendum að ný hús falli sem best að núverandi byggð. Innan greinargerðar deiliskipulags eru gerðar kröfur um valmaþak m.a. á eftirfarandi lóðum
– Traustatún 2, 4, 6, 8 og 10 (Kinnin)
Sveitarstjórn leggur til að þakgerð verði gefin frjáls þeim lóðum sem tilgreindar eru að framan.

-liður 6, Skálabrekka L170163; Malarnáma E3; Framkvæmdarleyfi – 2208033
Heiðarás ehf sækir um framkvæmdaleyfi fyrir efnistöku úr malarnámu skilgreind E3 á aðalskipulagi Bláskógabyggðar. Samkvæmt upplýsingum frá umsækjanda hefur verið tekið um 4.700 m3 af efni úr námunni. Umsótt efnistaka er áætluð alls um 33.000 m3. 16.000 m3 vegna vegagerðar innan jarðar Skálabrekku L170163 og 12.000 vegna annarra framkvæmda á 6 ára tímabili. Gert er ráð fyrir því að samhliða verði sótt um starfsleyfi fyrir námunni. Umsækjandi bendir jafnframt á að náman er ranglega staðsett á aðalskipulagi sveitarfélagsins.
Sveitarstjórn Bláskógabyggðar gerir ekki athugasemd við útgáfu framkvæmdaleyfis á grundvelli 5. mgr. 13. gr. skipulagslaga nr. 123/2010. Mælist sveitarstjórn til þess að fyrirhuguð efnistaka verði grenndarkynnt aðliggjandi landeigendum. Sveitarstjórn mælist einnig til þess að unnin verði óveruleg breyting á aðalskipulagi sveitarfélagsins með það að markmiði að leiðrétta staðsetningu námupunktar á uppdrætti aðalskipulagsins.

-liður 7, Traustatún 10 L167638; Þakform; Fyrirspurn – 2208044
Lögð er fram fyrirspurn til skipulagsnefndar frá Þór Lína Sævarssyni er varðar heimild fyrir breyttu þakformi á lóð Traustatúns 10 á Laugarvatni.
Skipulagsnefnd UTU mæltist til þess við sveitarstjórn Bláskógabyggðar að skilmálar nýlega samþykkts deiliskipulags fyrir Laugarvatn verði óbreyttir og mæltist til þess að framlagðri fyrirspurn verði synjað. Tilgangur viðkomandi skilmála var að sjá til þess að ný hús myndu falla sem best að núverandi byggð og á milli þeirra væri innbyrðis samræmi m.t.t. hlutfalla og og forms.
Sveitarstjórn Bláskógabyggðar tekur ekki undir framlagða bókun skipulagsnefndar vegna fyrirspurnar er varðar þakform innan deiliskipulagsins að Laugarvatni. Að mati sveitarstjórnar er valmaþak ekki ríkjandi formgerð þaka á svæðinu og telur því að ekki sé ástæða til að hefta þakform nýrra bygginga eingöngu við valmaþak á þeim forsendum að ný hús falli sem best að núverandi byggð. Innan greinargerðar deiliskipulags eru gerðar kröfur um valmaþak m.a. á eftirfarandi lóðum
– Traustatún 2, 4, 6, 8 og 10 (Kinnin)
Sveitarstjórn leggur til að þakgerð verði gefin frjáls á þeim lóðum sem tilgreindar eru að framan.