316. fundur sveitarstjórnar Bláskógabyggðar

-liður 3, Efri-Reykir L167080; Frístundabyggð; Deiliskipulag – 2209096
Lögð er fram umsókn frá Rúnari Gunnarsyni er varðar nýtt deiliskipulag frístundabyggðar í landi Efri-Reykja L167080. Um er að ræða skipulagningu 78 frístundalóða á skipulagsreit F73 innan aðalskipulags Bláskógabyggðar. Stærðir lóða innan svæðisins eru á bilinu 6-8.000 fm og gert er ráð fyrir að nýtingarhlutfall lóða fari ekki umfram 0,03. Heimilt er að byggja sumarhús, gestahús allt að 40 fm og geymslu allt að 15 fm innan nýtingarhlutfalls. Sveitarstjórn telur að framlagt deiliskipulag samræmist ekki stefnu aðalskipulags varðandi skilgreiningu nýrra frístundasvæða, þar sem segir að ný frístundasvæði verði ekki stærri en 25 ha innan hverrar jarðar. Að mati sveitarstjórnar skal ekki skilgreina byggingarreiti innan svæðis við Brúará sem tiltekið er innan náttúruminjaskrár. Auk þess telur sveitarstjórn að skráning minja innan svæðisins þurfi að fara fram. Sveitarstjórn Bláskógabyggðar synjar því málinu í núverandi mynd.

-liður 4, Efsti-Dalur 2 (L167631); umsókn um byggingarleyfi; sumarbústaðir mhl 20 og mhl 21 – 2209085
Fyrir liggur umsókn Bent L. Fróðasonar fyrir hönd Efstadalskot ehf., móttekin 23.09.2022, um byggingarheimild að flytja tvo fullbúna 67,6 m2 sumarbústaði frá Snorrastöðum, innan sama sveitarfélags, á jörðina Efsti-Dalur 2 L167631 í Bláskógabyggð. Unnið er að heildarendurskoðun deiliskipulags að Efsta-Dal 2.
Þar sem vinna vegna endurskoðunar á deiliskipulagi svæðisins stendur yfir samþykkir sveitarstjórn Bláskógabyggðar að málið fái málsmeðferð á grundvelli 44. gr. skipulagslaga nr. 123/2010 með fyrirvara um niðurstöðu grenndarkynningar. Berist engar athugasemdir vegna grenndarkynningar skal málinu vísað til afgreiðslu byggingarfulltrúa.

-liður 5, Skálabrekka-Eystri L224848; Hellunesgata 13 og 16, Grjótnesgata 7 og 14; Breytt staðföng og stofnun lóða – 2210008
Lögð er fram umsókn um breytta staðvísa innan skipulags fyrir frístundasvæði í landi Skálabrekku-Eystri L224848 vegna umsóknar um lóðastofnun. Óskað er eftir að göturnar fái staðvísana Hellunesgata og Grjótnesgata í stað Vestri- og Eystri-Kvíslar. Heitin koma frá nöfnum nesjanna tveggja sem liggja út frá jörðinni.
Sveitarstjórn Bláskógabyggðar geri ekki athugasemd við breytt staðföng.

Líkt og greinir í fyrra svari sveitarstjórnar telur sveitarstjórn mikilvægt að mál þetta verði til lykta leitt fyrir dómstólum.

Í fyrirspurnunum til sveitarstjórnar er bent á að ekki sé til staðar heimild í lögum um meðferð einkamála sem leysi stjórnvöld undan upplýsingaskyldu sinni. Þótt það sé rétt að ekki sé til staðar bein heimild þess efnis getur það komið til að skjal geti geymt ákveðin atriði sem háð eru trúnaðarskyldu, sbr. m.a. 69. gr. laganna. Sveitarfélagið telur að þær upplýsingar sem leitað er eftir með fyrirspurnunum feli ekki slíka trúnaðarskyldu í sér.

Líkt og greinir í fyrra svari sveitarfélagsins gildir svokölluð málsforræðisregla fyrir íslenskum dómstólum. Í því felst að aðilar hafa sjálfir forræði á málum sínum, m.a. um það hvaða kröfur eru gerðar, hvaða málsástæður eru færðar fram og hvaða skjöl og sönnunargögn eru lögð fram. Í þeirri reglu felst einnig að gagnaðili í dómsmáli getur ekki krafist framlagningar skjals eða að fá tilteknar upplýsingar með öðrum leiðum, sbr. m.a. úrskurð Landsréttar í máli nr. 555/2020.

Varðandi fyrirspurnirnar telur sveitarfélagið rétt að árétta að fullyrðing í greinargerð um að greidd séu laun við fjallskil kemur til vegna bótakröfu vegna tímabundins atvinnutjóns. Er í greinargerðinni jafnframt bent á að engin gögn séu lögð fram vegna tekna við bústörf, hvort sem um er að ræða almenn bústörf eða þá í tengslum við blóðmerarækt. Slíkar tekjur eiga að koma til frádráttar bótum vegna tímabundins atvinnutjóns, en á opinberum vettvangi hefur Sigríður lýst því yfir að hún sé bóndi og hafi tekjur af búrekstri.