Listrými – Myndlist fyrir alla

Myndlistarnámskeið Listrýmis í Listasafni Árnesinga hófust haustið 2015 og hafa verið í stöðugri þróun til að koma til móts við óskir og þarfir samfélagsins á Suðurlandi. Markmiðið er að bjóða upp á námskeið í hinum ýmsu greinum myndlistar, í heimabyggð og fyrir alla.

 

Á dagskrá Listrýmis veturinn 2017-18 eru fjölbreytt námskeið í teikningu, málun, mótun, tækniaðferðum og hugmyndaþróun. Flest námskeiðin í vetur eru í formi helgarnámskeiða þar sem fólk hefur tækifæri til að kynnast og kafa í viðfangsefnið yfir heila helgi. Kennt er í Listasafni Árnesinga í Hveragerði þar sem aðstaðan til sköpunar er góð, auk þess sem bækurnar og sýningarnar á safninu gefa möguleika á nánari tengslum við listaverk og sögu.

 

Öll heimili í Árnessýslu og Rangárvallasýslum ættu nú að vera búin að fá nýja bækling Listrýmis í hús en honum er dreift nú í vikunni.

 

Námskeiðin sem boðið er upp á í vetur eru: Myndin í huganum – Teiknun og málun, Litir og flæði – Vatnslitamálun 1, Málverk og sköpun – Blönduð tækni, Masterclass – Olíumálun, tækni og aðferðir, Anatómía og módel – Teiknun og málun, Kafað í djúpið – Vatnslitamálun 2, Mótun – Lágmyndagerð og Litir og form – Olíumálun. Einnig er vilji fyrir því að auka við námskeiðsúrvalið, líka fyrir börn og eru allar hugmyndir vel þegnar í því sambandi.

 

Leiðbeinendur Listrýmis eru allir búsettir á Suðurlandi en það eru þau Dagný Guðmundsdóttir, Guðrún Tryggvadóttir, Jakob Veigar Sigurðsson og Mýrmann.

Verkefnisstjóri Listrýmis er Guðrún Tryggvadóttir myndlistarmaður, sem hefur langa reynslu af námskeiðahaldi á sviði myndlistar. Verkefnið er styrkt af Uppbyggingasjóði Suðurlands.