Ásborg Arnþórsdóttir er ferðamálafulltrúi uppsveita Árnessýslu. Verksvið hennar er upplýsingamiðlun, kynningarmál, ráðgjöf og verkefnastjórnun.

Í Bláskógabyggð hafa menn boðið gesti velkomna í gegnum aldirnar og gera enn.  Ferðaþjónusta byggir hér á gömlum hefðum, enda hafa þekktar náttúruperlur og sögustaðir í sveitinni laðað að sér gesti lengur en elstu menn muna.  Þingvelli, Gullfoss, Geysi, Skálholt og Laugarvatn þekkja allir og fjölbreytt þjónusta og afþreying er í boði. Allir ættu að finna þjónustu við sitt hæfi og alltaf er eitthvað nýtt á hverju ári.  Gistimöguleikar eru margbreytilegir;  glæsileg hótel, sumarhús, fjallaskálar, farfuglaheimili og tjaldsvæði.  Veitingastaðir eru fjölbreyttir og flestir bjóða uppá mat úr héraði.  Þrjár sundlaugar eru í sveitinni og víða heitir pottar á áningarstöðum.

Í Þingvallaþjóðgarði er fræðslumiðstöð og boðið upp á gönguferðir með leiðsögn. Í Skálholti er skipa sumartónleikar fastan sess á sumrin.  Dýragarðurinn í Slakka er vinsæll áningarstaður fyrir fjölskyldur og sama má segja um Ferðamannafjósið í Efstadal og Garðyrkjustöðina Friðheima þar sem boðið er upp á fræðslu um búskap og garðyrkju Völundargarður er á Engi og lífrænn markaður.  Boðið er upp á siglingar á Hvítá og ferðir á Langjökul.  Fjölbreyttar hestaferðir eru í boði, hestasýningar, golfvellir og víða eru fallegar gönguleiðir og lág fell eða fjöll sem hægt er að klífa. Ferðamálafulltrúi mælir með því að þeir sem dvelja í Bláskógabyggð í lengri eða skemmri tíma kynni sér það sem Uppsveitir Árnessýslu hafa upp á að bjóða.  Hér er góð samvinna milli sveitarfélaga.   Ferðaþjónustustaðir eru hver með sína sérstöðu, þeir vinna vel saman og skipa Uppsveitunum sess sem ferðaþjónustusvæði í fremstu röð. Ítarlegar upplýsingar er að finna á Uppsveitakortinu sem gefið er út á hverju ári með tæmandi lista yfir þjónustu. Kortið liggur frammi á upplýsingamiðstöðvum og þjónustustöðum á svæðinu og víðar á Suðurlandi. Einnig má fræðast um þjónustu og viðburði  á Uppsveitasíðunum  www.sveitir.is

Verið velkomin, Ásborg Arnþórsdóttir Ferðamálafulltrúi